Taliye Maxamed Xasan Sandheere ayaa maanta magaalada Muqdisho kulan wada-tashi ah kula qaatay Malaaqa Guud ee Beesha Eelaay, Malaaq Sheekh Musdaf, Xildhibaanno ka tirsan Dowladda Koonfur Galbeed iyo xubno kale oo isugu jiray siyaasiyiin, waxgarad iyo saraakiil.
Kulanka waxaa ka qeyb galay Xildhibaan Axmed Cali Nuur [AC], Xildhibaan Liibaan Midnimo, Malaaq Cabdi Naasir, Siyaasi Siidi Arlaadi iyo xubno kale oo ka tirsan Beesha Eelaay.Shirkan ayaa ahaa mid looga gol lahaa is-xogwareysi iyo wada-tashi ku saabsan xaaladda siyaasadeed iyo arrimaha ka taagan deegaanada Koonfur Galbeed, xilli Taliye Sandheere uu dhawaan soo gaaray magaalada Muqdisho.
Kulanka oo ahaa mid albaabadu u xirnaayeen, muddo dheerna qaatay, ayaa sida ay Nation TV u sheegeen qaar ka mid ah xubnihii ka qeyb galay, waxaa lagu gorfeeyay arrimo muhiim ah oo la xiriira xaaladda Koonfur Galbeed. Waxaa sidoo kale la sheegay in kulanka la isku afgartay in la xoojiyo midnimada iyo wada-jirka Beesha Eelaay, iyadoo si wadajir ah looga shaqeynayo danaha guud iyo raadinta xuquuqda beesha kaga maqan dowlada federaalka iyo koonfur galbeed.
