Shir ay isugu imaanayaan guddoomiyeyaasha gobollada iyo degmooyinka Dowlad Goboleedka Koonfur Galbeed ayaa Sabtida ka furmaya magaalada Baydhabo, xarunta gobolka Bay, iyadoo hoggaanka Koonfur Galbeed uu wada dadaallo lagu xoojinayo wada-shaqeynta maamullada iyo mideynta bulshada iyo siyaasiyiinta maamulka.
Hoggaamiyaha Koonfur Galbeed, Sheekh Aadan Maxamed Nuur Madoobe, ayaa Wasiirka Arrimaha Gudaha, Federaalka iyo Dib-u-heshiisiinta Koonfur Galbeed faray inuu isugu yeero dhammaan guddoomiyeyaasha gobollada iyo degmooyinka maamulka. Sida ay ogaatay Nation TV, shirka ayaa diiradda lagu saari doonaa xaaladaha ka jira Koonfur Galbeed, caqabadaha maamulka iyo bulshada, iyo sidii loo yeelan lahaa ajandayaal wax-ku-ool ah oo lagu mideeyo dadaallada horumarineed iyo kuwa amni.
Dhanka kale, maanta magaalada Baydhabo waxaa gaaray wafdi uu hoggaaminayo Guddoomiyaha Gobolka Bakool, Maxamed Axmed Maxamed, waxaana qeyb ka ah maamullada degmooyinka Xuddur, Rabdhuure iyo Tiyeeglow.
Kulankan ayaa noqonaya markii ugu horreysay tan iyo markii la doortay Hoggaamiyaha Koonfur Galbeed, Sheekh Aadan Maxamed Nuur Madoobe, oo ay si wadajir ah u kulmaan Guddoomiyeyaasha gobollada iyo degmooyinka Koonfur Galbeed, iyadoo la filayo in shirka laga soo saaro ajandayaal lagu xoojinayo wada-shaqeynta maamulka, amniga iyo adeegyada bulshada https://www.facebook.com/share/v/19LZxoRC9Q/
