Khilaaf siyaasadeed oo u dhexeeya hay’adaha dowladda federaalka ayaa soo shaac baxay, kaddib markii Golaha Shacabka uu maanta ka hor yimid go’aan kasoo baxay Xafiiska Ra’iisul Wasaaraha Xamsa Cabdi Barre oo ku saabsanaa dib-u-habaynta iyo habka loo buuxinayo xilalka Agaasime-waaxeedyada wasaaradaha iyo hay’adaha dowladda.
Xildhibaannada Golaha Shacabka oo kulan ku yeeshay xarunta Villa Hargeysa ayaa laalay go’aankaasi, iyagoo ku tilmaamay mid aan waafaqsanayn sharciga, sida lagu soo warramay. Go’aanka Golaha ayaa yimid maalmo kaddib markii Ra’iisul Wasaare Xamsa uu faray wasaaradaha iyo hay’adaha dowladda in xilalka Agaasime-waaxeedyada lagu buuxiyo hannaan tartan furan oo lagu saleeyo karti, aqoon, khibrad iyo mudnaan.
Ra’iisul Wasaaraha ayaa sidoo kale faray Guddiga Shaqaalaha Rayidka Dowladda in 20-ka Sebtembar la bilaabo wejiga koowaad ee dib-u-habaynta Agaasime-waaxeedyada, isagoo ku sababeeyay in xilalkani ay door muhiim ah ku leeyihiin maamulka iyo hirgelinta siyaasadaha dowladda. Tallaabada Golaha Shacabka ayaa dhalisay dood siyaasadeed oo ku saabsan awoodaha Xukuumadda iyo Baarlamaanka, iyadoo indhaha lagu hayo sida ay labada dhinac uga falcelin doonaan go’aanka maanta iyo halka uu ku dambeyn doono is-mariwaaga soo baxay.
